“Ике ел эчендә 640 мәктәпне Интернетка тоташтырдык”

Бу хакта төбәк Башлыгы Радий Хәбиров социаль челтәрләрдәге рәсми битендә белдерде.

“Быел ук без республиканың барлык мәктәпләрен югары тизлекле Интернетка тоташтырачакбыз. Андыйлар күп калмады – 316 мәктәп”, — дип яза төбәк Башлыгы Радий Хәбиров социаль челтәрләрдәге рәсми битендә.

Билгеле булуынча, узган елның гыйнварында Президент Владимир Путин, Федераль җыелышка Юллама белән чыгыш ясап, “Доступный интернет” проектын башлап җибәрде.

“Без проектны күтәреп алдык һәм барлык мәктәпләрне дә Интернетка тоташтырырга, ә 2023 елда 1109 мәктәпне заманча компьютер сыйныфлары белән җиһазландырырга булдык. Тормыш шулай алга китте ки, Интернетсыз булмый. Курслар, семинарлар, практикумнар, ә пандемия вакытында — дәресләр. Санлы трансформация вакыты җитте, ул үз шартларын куя. 2 ел эчендә без Интернетка 640 мәктәпне тоташтырдык.
Бу масштаблы бурыч иде. Чөнки без Русиядә мәктәпләр саны буенча дүртенче, алар бездә — 1873. Башкортстанның барлык мәктәпләрендә дә Интернет булачак”, — дип ассызыклый Радий Хәбиров.